សៀវភៅ «ព្រះបន្ទូលរបស់ព្រះជាម្ចាស់ ថ្លែងទៅកាន់សកលលោកទាំងមូល» គឺជាផ្នែកទីពីរនៃព្រះសូរសៀងដែលព្រះគ្រីស្ទបានសម្ដែងចេញនៅក្នុងអត្តសញ្ញាណជាព្រះជាម្ចាស់ផ្ទាល់ព្រះអង្គ។ ព្រះសូរសៀងទាំងនេះ គ្របដណ្ដប់លើរយៈពេលគិតចាប់ពីថ្ងៃទី២០ ខែកុម្ភៈ ឆ្នាំ១៩៩២ រហូតដល់ថ្ងៃទី០១ ខែមិថុនា ឆ្នាំ១៩៩២ ហើយមានទាំងអស់ ៤៧ ជំពូក។ លក្ខណៈ ខ្លឹមសារ និងទស្សនៈនៃព្រះបន្ទូលរបស់ព្រះជាម្ចាស់នៅក្នុងព្រះសូរសៀងទាំងនេះ គឺខុសគ្នាទាំងស្រុងពីសៀវភៅ «ព្រះសូរសៀងរបស់ព្រះគ្រីស្ទ កាលពីដើមដំបូង»។ សៀវភៅ «ព្រះសូរសៀងរបស់ព្រះគ្រីស្ទ កាលពីដើមដំបូង» លាតត្រដាង និងណែនាំពីឥរិយាបថខាងក្រៅរបស់មនុស្ស និងជីវិតខាងវិញ្ញាណដ៏សាមញ្ញរបស់ពួកគេ។ ចុងក្រោយ សៀវភៅនេះបញ្ចប់ទៅដោយនិយាយពី «ការល្បងលរបស់អ្នកស៊ីឈ្នួល»។ ក៏ប៉ុន្តែ សៀវភៅ «ព្រះបន្ទូលរបស់ព្រះជាម្ចាស់ ថ្លែងទៅកាន់សកលលោកទាំងមូល» វិញ ចាប់ផ្ដើមដោយការនិយាយសរុបពីអត្តសញ្ញាណរបស់មនុស្សក្នុងនាមជាអ្នកស៊ីឈ្នួល និងពីចំណុចចាប់ផ្ដើមនៃជីវិតរបស់ពួកគេក្នុងនាមជារាស្ត្ររបស់ព្រះជាម្ចាស់។ សៀវភៅណែនាំមនុស្សចូលទៅក្នុងចំណុចកំពូលទីពីរនៃកិច្ចការរបស់ព្រះជាម្ចាស់ ដែលក្នុងអំឡុងពេលនោះ ពួកគេត្រូវឆ្លងកាត់ការល្បងលនៃបឹងភ្លើង ការល្បងលនៃសេចក្ដីស្លាប់ និងសម័យនៃការស្រឡាញ់ព្រះជាម្ចាស់។ ជំហានទាំងអស់នេះ លាតត្រដាងពីភាពកខ្វក់របស់មនុស្សនៅចំពោះព្រះជាម្ចាស់ ក៏ដូចជាមុខមាត់ពិតរបស់មនុស្សផងដែរ។ ចុងក្រោយ ព្រះជាម្ចាស់បញ្ចប់ដោយជំពូកមួយដែលព្រះអង្គត្រូវបែកចេញពីមនុស្ស ហើយក៏បញ្ចប់គ្រប់ជំហានទាំងអស់នៃការយកកំណើតជាមនុស្សរបស់ព្រះជាម្ចាស់ ដើម្បីយកឈ្នះលើក្រុមមនុស្សដំបូងគេនេះ។

នៅក្នុងសៀវភៅ «ព្រះបន្ទូលរបស់ព្រះជាម្ចាស់ ថ្លែងទៅកាន់សកលលោកទាំងមូល» នេះ ព្រះជាម្ចាស់សម្ដែងចេញព្រះបន្ទូលរបស់ទ្រង់តាមទស្សនៈរបស់ព្រះវិញ្ញាណ។ លក្ខណៈដែលទ្រង់មានបន្ទូល មិនអាចឱ្យមនុស្សជាតិដែលព្រះបានបង្កើតមកនេះ សម្រេចបានឡើយ។ ជាងនេះទៅទៀត ពាក្យពេចន៍ និងបែបបទនៃព្រះបន្ទូលរបស់ទ្រង់ ពីរោះស្ដាប់ និងទាក់ទាញចិត្តណាស់ ហើយគ្មានទម្រង់ស្នាដៃអក្សរសិល្ប៍របស់មនុស្សណាមួយ អាចយកមកប្រៀបធៀបបានទេ។ ព្រះបន្ទូលដែលទ្រង់លាតត្រដាងពីមនុស្ស ច្បាស់លាស់ណាស់ គ្មានទស្សនវិជ្ជាណាមួយអាចប្រកែកបានឡើយ ហើយព្រះបន្ទូលទាំងនោះធ្វើឱ្យមនុស្សទាំងអស់ចុះចូល។ ព្រះបន្ទូលដែលព្រះជាម្ចាស់ជំនុំជម្រះមនុស្ស ប្រៀបបានទៅនឹងដាវដ៏សែនមុត ដែលកាប់មុតជ្រៅទៅដល់ព្រលឹងរបស់មនុស្ស មុតយ៉ាងជ្រៅបំផុតរហូតធ្វើឱ្យពួកគេគ្មានកន្លែងត្រូវលាក់បំពួន។ ព្រះបន្ទូលដែលទ្រង់លួងលោមមនុស្ស គឺមានសេចក្ដីមេត្តាករុណា និងក្ដីអាណិតស្រឡាញ់ ហើយព្រះបន្ទូលទាំងនោះ មានភាពកក់ក្ដៅប្រៀបដូចជាម្ដាយជាទីស្រឡាញ់ឱបថ្នមកូនដូច្នោះដែរ ហើយព្រះបន្ទូលទាំងនោះធ្វើឱ្យមនុស្សមានអារម្មណ៍សុខសាន្ត ដែលគេមិនធ្លាប់មានពីមុនមកឡើយ។ លក្ខណៈដ៏អស្ចារ្យបំផុតតែមួយគត់នៃព្រះសូរសៀងទាំងនេះគឺថា ក្នុងអំឡុងដំណាក់កាលនេះ ព្រះជាម្ចាស់ពុំបានថ្លែងព្រះបន្ទូលដោយប្រើអត្តសញ្ញាណជាព្រះយេហូវ៉ា ឬព្រះយេស៊ូវគ្រីស្ទឡើយ ហើយក៏មិនប្រើអត្តសញ្ញាណជាព្រះគ្រីស្ទនៃគ្រាចុងក្រោយដែរ។ ផ្ទុយទៅវិញ ព្រះអង្គប្រើអត្តសញ្ញាណពីកំណើតរបស់ទ្រង់ គឺ «ព្រះអាទិករ»។ ព្រះអង្គមានបន្ទូល និងបង្រៀនដល់មនុស្សណាដែលដើរតាមទ្រង់ និងមនុស្សណាដែលមិនទាន់បានដើរតាមទ្រង់នៅឡើយ។ អាចនិយាយបានថា នេះគឺជាលើកទីមួយហើយ គិតចាប់តាំងពីការបង្កើតលោកីយ៍មក ដែលព្រះជាម្ចាស់បានមានបន្ទូលទៅកាន់មនុស្សជាតិរាល់គ្នានោះ។ ពីមុនមក ព្រះជាម្ចាស់មិនធ្លាប់ថ្លែងបន្ទូលទៅកាន់មនុស្សជាតិដែលព្រះបានបង្កើតមកដោយល្អិតល្អន់ និងមានលក្ខណៈជាប្រព័ន្ធបែបនេះទេ។ ពិតណាស់ នេះក៏ជាលើកទីមួយដែរ ដែលព្រះអង្គបានមានបន្ទូលទៅកាន់មនុស្សជាតិរាល់គ្នាយ៉ាងច្រើន និងក្នុងរយៈពេលយូរបែបនេះ។ នេះគឺជារឿងដែលមិននឹកស្មានដល់ទាល់តែសោះ។ ជាងនេះទៅទៀត ព្រះសូរសៀងទាំងនេះ បង្កើតបានជាអត្ថបទដំបូងគេបង្អស់ ដែលព្រះជាម្ចាស់បានសម្ដែងចេញនៅក្នុងចំណោមមនុស្សជាតិ ដែលព្រះអង្គលាតត្រដាងពីមនុស្ស ណែនាំពួកគេ ជំនុំជម្រះពួកគេ និងមានបន្ទូលត្រង់ទៅត្រង់មកជាមួយពួកគេ ហើយនេះក៏ជាព្រះសូរសៀងដំបូងគេដែរ ដែលព្រះជាម្ចាស់អនុញ្ញាតឱ្យមនុស្សស្គាល់ពីស្នាមព្រះបាទារបស់ទ្រង់ ស្គាល់ពីកន្លែងដែលទ្រង់គង់នៅ ស្គាល់ពីនិស្ស័យរបស់ព្រះជាម្ចាស់ ស្គាល់ពីអ្វីដែលជាកម្មសិទ្ធិ និងលក្ខណៈរបស់ទ្រង់ ស្គាល់ពីព្រះតម្រិះរបស់ព្រះជាម្ចាស់ ព្រមទាំងព្រះទ័យព្រួយបារម្ភរបស់ទ្រង់ចំពោះមនុស្សជាតិផងដែរ។ អាចនិយាយបានថា ចាប់តាំងពីការបង្កើតរបស់សព្វសារពើមក នេះគឺជាព្រះសូរសៀងដំបូងគេហើយ ដែលព្រះជាម្ចាស់បានថ្លែងទៅកាន់មនុស្សជាតិចេញពីស្ថានសួគ៌ជាន់ទីបី ហើយនេះក៏ជាលើកទីមួយដែរ ដែលព្រះជាម្ចាស់បានប្រើអត្តសញ្ញាណពីកំណើតរបស់ទ្រង់ ដើម្បីលេចមក និងសម្ដែងចេញព្រះសូរសៀងនៃព្រះទ័យរបស់ទ្រង់ទៅកាន់មនុស្សជាតិតាមរយៈព្រះបន្ទូលទាំងនេះ។

ព្រះសូរសៀងទាំងនេះ ជ្រាលជ្រៅនិងមិនអាចវាស់ស្ទង់បានឡើយ ហើយមិនងាយនឹងយល់បាននោះទេ ក៏ពិបាកនឹងដឹងពីប្រភពដើម និងគោលបំណងនៃព្រះបន្ទូលរបស់ព្រះជាម្ចាស់ដែរ។ ដូច្នេះ ព្រះគ្រីស្ទបានបន្ថែមការពន្យល់មួយទៀតនៅបន្ទាប់ពីជំពូកនីមួយៗ ដោយប្រើប្រាស់ភាសាងាយៗ ដើម្បីឱ្យមនុស្សយល់បាន ដើម្បីឱ្យពួកគេកាន់តែមានភាពច្បាស់លាស់អំពីព្រះសូរសៀងនោះបន្ថែមទៀត។ ការពន្យល់នេះ គួបផ្សំនឹងព្រះសូរសៀងនោះផ្ទាល់ផង ធ្វើឱ្យមនុស្សកាន់តែងាយយល់ និងកាន់តែស្គាល់ពីព្រះបន្ទូលរបស់ព្រះជាម្ចាស់ច្រើនឡើងថែមទៀត។ យើងបានដាក់ព្រះបន្ទូលទាំងនេះជាឧបសម្ព័ន្ធមួយសម្រាប់សៀវភៅ «ព្រះបន្ទូលរបស់ព្រះជាម្ចាស់ ថ្លែងទៅកាន់សកលលោកទាំងមូល»។ នៅក្នុងព្រះបន្ទូលទាំងនេះ ព្រះគ្រីស្ទផ្ដល់ការពន្យល់ដោយប្រើប្រាស់ពាក្យពេចន៍ដែលងាយយល់បំផុត។ ការរួមផ្សំបញ្ចូលគ្នារវាងព្រះបន្ទូលនិងការពន្យល់នេះ គឺជាការផ្សំផ្គំដ៏ល្អឥតខ្ចោះរវាងភាពជាព្រះ និងភាពជាមនុស្សរបស់ព្រះជាម្ចាស់។ ទោះបីជាព្រះជាម្ចាស់មានបន្ទូលនៅក្នុងទម្រង់ជាបុរសទីបីនៅក្នុងឧបសម្ព័ន្ធនេះក៏ដោយ ក៏គ្មាននរណាម្នាក់អាចបដិសេធបានថា ព្រះបន្ទូលទាំងនេះ មិនមែនជាព្រះបន្ទូលដែលព្រះជាម្ចាស់ថ្លែងមកដោយផ្ទាល់នោះដែរ ដ្បិតគ្មានមនុស្សណាម្នាក់អាចពន្យល់ពីព្រះបន្ទូលរបស់ព្រះជាម្ចាស់បានច្បាស់លាស់នោះទេ។ មានតែព្រះជាម្ចាស់ផ្ទាល់ព្រះអង្គប៉ុណ្ណោះ ដែលអាចស្រាយបំភ្លឺពីប្រភពដើម និងបំណងនៃព្រះសូរសៀងរបស់ទ្រង់បាន។ ហេតុដូច្នេះ ទោះបីជាព្រះជាម្ចាស់មានបន្ទូលដោយប្រើមធ្យោបាយជាច្រើនក៏ដោយ ក៏បំណងនៃកិច្ចការរបស់ទ្រង់ មិនដែលផ្លាស់ប្ដូរឡើយ ហើយគោលបំណងនៃផែនការរបស់ទ្រង់ក៏មិនដែលប្រែប្រួលដែរ។

ទោះបីជាសៀវភៅ «ព្រះបន្ទូលរបស់ព្រះជាម្ចាស់ ថ្លែងទៅកាន់សកលលោកទាំងមូល» នេះ បញ្ចប់ទៅដោយមានជំពូកមួយដែលព្រះជាម្ចាស់ត្រូវបែកចេញពីមនុស្សក៏ដោយ ក៏តាមពិតទៅ នេះគឺជាពេលដែលកិច្ចការនៃការយកឈ្នះ និងកិច្ចការនៃការសង្គ្រោះរបស់ព្រះជាម្ចាស់នៅក្នុងចំណោមមនុស្ស និងកិច្ចការរបស់ទ្រង់ក្នុងការប្រោសមនុស្សឱ្យបានគ្រប់លក្ខណ៍ ត្រូវបានបើកបង្ហាញជាផ្លូវការដែរ។ ដូច្នេះ វាជាការសមស្របហើយ ដែលយើងចាត់ទុកសៀវភៅ «ព្រះបន្ទូលរបស់ព្រះជាម្ចាស់ ថ្លែងទៅកាន់សកលលោកទាំងមូល» នេះ ជាសេចក្ដីទំនាយអំពីកិច្ចការរបស់ព្រះជាម្ចាស់នៅគ្រាចុងក្រោយនោះ។ ដ្បិតមានតែបន្ទាប់ពីចំណុចនេះប៉ុណ្ណោះ ទើបបុត្រមនុស្សដែលយកកំណើតជាមនុស្សនេះ ចាប់ផ្ដើមបំពេញកិច្ចការ និងថ្លែងព្រះបន្ទូលជាផ្លូវការ ដោយប្រើអត្តសញ្ញាណរបស់ព្រះគ្រីស្ទ ដោយយាងដើរនៅក្នុងចំណោមពួកជំនុំ ប្រទានជីវិត ប្រទានការស្រោចស្រព និងឃ្វាលរាស្រ្តរបស់ទ្រង់គ្រប់គ្នា ហេតុដូច្នេះហើយ ទើបបានជាមានព្រះសូរសៀងជាច្រើននៅក្នុងសៀវភៅ «ព្រះបន្ទូលរបស់ព្រះគ្រីស្ទ ខណៈដែលទ្រង់យាងក្នុងពួកជំនុំនានា» នេះ។