ដោយសារអ្នករាល់គ្នាត្រូវហៅថាជារាស្ត្ររបស់ខ្ញុំ ដូច្នេះអ្វីៗមិនដូចមុនទៀតនោះទេ។ អ្នករាល់គ្នាគប្បីយកចិត្តទុកដាក់ និងស្ដាប់បង្គាប់ព្រះសូរសៀងនៃព្រះវិញ្ញាណរបស់ខ្ញុំ ហើយដើរតាមកិច្ចការរបស់ខ្ញុំយ៉ាងប្រកិត។ អ្នកមិនត្រូវញែកវិញ្ញាណរបស់ខ្ញុំចេញពីសាច់ឈាមរបស់ខ្ញុំឡើយ ដ្បិតទាំងវិញ្ញាណនិងសាច់ឈាមខ្ញុំគឺតែមួយទេ ហើយតាមធម្មជាតិ មិនអាចបំបែកចេញពីគ្នាបានទេ។ នរណាក៏ដោយដែលបំបែកព្រះវិញ្ញាណចេញពីអង្គរបស់ព្រះ ហើយផ្ដោតទៅលើអង្គរបស់ព្រះតែម្យ៉ាង ឬទៅលើព្រះវិញ្ញាណតែម្យ៉ាង នោះនឹងត្រូវទទួលរងការខាតបង់ ហើយអាចត្រឹមផឹកពែងដ៏ល្វីងរបស់ពួកគេផ្ទាល់ប៉ុណ្ណោះ គ្មានជម្រើសណាផ្សេងឡើយ។ មានតែអស់អ្នកណាដែលអាចចាត់ទុកព្រះវិញ្ញាណ និងអង្គរបស់ព្រះថាជារបស់តែមួយ មិនអាចបំបែកពីគ្នាបានប៉ុណ្ណោះ ទើបគ្រប់គ្រាន់នឹងស្គាល់ខ្ញុំបាន។ ជីវិតនៅក្នុងខ្លួនពួកគេ នឹងត្រូវផ្លាស់ប្ដូរបន្ដិចម្ដងៗ។ ដើម្បីឱ្យជំហានបន្ទាប់នៃកិច្ចការរបស់ខ្ញុំអាចដំណើរការទៅបានដោយរលូន និងគ្មានការរាំងស្ទះ ខ្ញុំប្រើការបន្សុទ្ធនៃព្រះបន្ទូល ដើម្បីសាកល្បងមនុស្សទាំងអស់គ្នានៅក្នុងដំណាក់របស់ខ្ញុំ ហើយប្រើវិធីសាស្ត្របំពេញកិច្ចការផ្សេងៗ ដើម្បីសាកល្បងអ្នកដែលដើរតាមខ្ញុំ។ អាចនិយាយបានថា ស្ថិតក្រោមកាលៈទេសៈទាំងនេះ ពួកគេសុទ្ធតែបាត់បង់ក្ដីសង្ឃឹមទាំងអស់។ ក្នុងនាមជារាស្រ្ត គ្មាននរណាម្នាក់ក្នុងចំណោមពួកគេ ដែលមានស្ថានភាពរបស់ខ្លួនវិជ្ជមាន និងសកម្មនោះទេ ហាក់បីដូចជាលំហទាំងមូលបានផ្លាស់ប្ដូរដូច្នោះដែរ។ មនុស្សខ្លះប្រឆាំងទាស់នឹងស្ថានសួគ៌ និងផែនដី។ មនុស្សខ្លះ លត់ដំខ្លួន និងទទួលយកការសាកល្បងពីព្រះបន្ទូលរបស់ខ្ញុំទាំងអស់សង្ឃឹម។ មនុស្សខ្លះសម្លឹងទៅលើមេឃ ហើយដកដង្ហើមធំ ភ្នែកពោរពេញទៅដោយទឹកភ្នែក ដូចជាកើតទុក្ខព្រួយដោយសារការស្លាប់បាត់បង់ជីវិតនៃកូនដែលទើបនឹងកើត ដែលមិនសមនឹងកាលវេលាដូច្នោះដែរ។ មនុស្សខ្លះថែមទាំងមានអារម្មណ៍ថា ការរស់នៅបែបនេះ គឺអាម៉ាស់មុខណាស់ ហើយក៏អធិស្ឋានទូលសុំឱ្យព្រះជាម្ចាស់យកពួកគេចេញឱ្យបានឆាប់ថែមទៀតផង។ មនុស្សខ្លះចំណាយពេលវេលាពេញមួយថ្ងៃលង់ក្នុងសេចក្ដីវង្វេងស្មារតី ហាក់បីដូចជាពួកគេបានធ្លាក់ខ្លួនឈឺធ្ងន់ ហើយមិនទាន់ដឹងខ្លួនវិញដូច្នោះដែរ។ មនុស្សខ្លះ បន្ទាប់ពីរអ៊ូរទាំហើយ ក៏ចាកចេញទៅដោយស្ងាត់ៗ។ ហើយមនុស្សខ្លះទៀត នៅតែសរសើរខ្ញុំចេញពីកន្លែងរបស់ពួកគេផ្ទាត់ ទោះពួកគេនៅបន្តអវិជ្ជមានទៀតក៏ដោយ។ បច្ចុប្បន្ននេះ នៅពេលដែលគ្រប់យ៉ាងត្រូវបានបើកសម្ដែង នោះខ្ញុំមិនចាំបាច់ត្រូវមានបន្ទូលពីអតីតកាលតទៅទៀតទេ។ រឿងដែលសំខាន់ជាងនេះគឺថា អ្នកគួរតែអាចនៅបន្តមានភក្ដីភាពបំផុតចំពោះតំណែងដែលខ្ញុំប្រទានដល់អ្នករាល់គ្នានាពេលបច្ចុប្បន្ននេះ ដើម្បីឱ្យអ្វីគ្រប់យ៉ាងដែលអ្នករាល់គ្នាធ្វើ បំពេញតាមព្រះទ័យយល់ស្របរបស់ខ្ញុំ ហើយអ្វីដែលអ្នករាល់គ្នានិយាយ គឺជាផលកើតចេញពីការបំភ្លឺ និងការស្រាយបំភ្លឺរបស់ខ្ញុំ ដើម្បីឱ្យទីបំផុតទៅ អ្វីៗដែលអ្នករាល់គ្នារស់នៅតាម អាចក្លាយជារូបអង្គរបស់ខ្ញុំ និងអាចក្លាយជាការបើកបង្ហាញរបស់ខ្ញុំទាំងស្រុង។

ព្រះបន្ទូលរបស់ខ្ញុំត្រូវបានថ្លែង និងសម្ដែងចេញនៅគ្រប់ពេលវេលា ឬគ្រប់ទីកន្លែង ហើយអ្នករាល់គ្នាក៏គួរតែស្គាល់ខ្លួនឯងនៅចំពោះព្រះភ័ក្ត្រខ្ញុំគ្រប់ពេលវេលាផងដែរ។ ជាងនេះទៅទៀត ពេលសព្វថ្ងៃនេះ មិនដូចពេលមុនឡើយ ហើយអ្នកមិនអាចសម្រេចអ្វីតាមដែលអ្នកចង់នោះទេ។ ផ្ទុយទៅវិញ ក្រោមការចង្អុលបង្ហាញពីព្រះបន្ទូលរបស់ខ្ញុំ អ្នកត្រូវតែមានសមត្ថភាពជម្នះលើរូបកាយរបស់ខ្លួន។ អ្នកត្រូវតែប្រើព្រះបន្ទូលរបស់ខ្ញុំជាគ្រឹះរបស់អ្នក ហើយអ្នកមិនត្រូវធ្វើអ្វីដោយធ្វេសប្រហែសនោះឡើយ។ អ្នកអាចស្វែងរកគ្រប់ទាំងមាគ៌ានៃការអនុវត្តជាក់ស្ដែងសម្រាប់ពួកជំនុំ នៅក្នុងព្រះបន្ទូលរបស់ខ្ញុំបាន។ អស់អ្នកណាដែលមិនធ្វើតាមព្រះបន្ទូលរបស់ខ្ញុំទេ អ្នកនោះប្រមាថដល់ព្រះវិញ្ញាណរបស់ខ្ញុំដោយផ្ទាល់ ហើយខ្ញុំនឹងបំផ្លាញពួកគេចោល។ ដោយសារអ្វីៗបានឈានមកដល់ស្ថានភាពដូចពេលបច្ចុប្បន្ននេះរួចទៅហើយ ដូច្នេះអ្នករាល់គ្នាមិនចាំបាច់ត្រូវមានអារម្មណ៍ឈឺចាប់ និងសោកស្ដាយចំពោះទង្វើ និងសកម្មភាពរបស់អ្នករាល់គ្នាកាលពីអតីតកាលពេកនោះទេ។ ព្រះទ័យដ៏សប្បុរសរបស់ខ្ញុំ គ្មានដែនកំណត់ឡើយ ប្រៀបដូចជាសមុទ្រ និងផ្ទៃមេឃដូច្នោះដែរ។ ខ្ញុំជ្រាបពីសមត្ថភាព និងចំណេះដឹងរបស់មនុស្សអំពីរូបខ្ញុំ ដូចជាខ្នងព្រះហស្ដរបស់ខ្ញុំដូច្នោះដែរ។ តើខ្ញុំអាចមិនជ្រាបរឿងនេះទេ? តើក្នុងចំណោមមនុស្ស មាននរណាដែលមិននៅក្នុងព្រះហស្ដរបស់ខ្ញុំទៅ? តើអ្នកគិតថា ខ្ញុំមិនជ្រាបថាកម្ពស់របស់អ្នកខ្ពស់ប៉ុនណា ឬថាខ្ញុំល្ងង់មិនដឹងរឿងនេះទាល់តែសោះមែនទេ? វាជារឿងមិនអាចទៅរួចនោះទេ! ដូច្នេះហើយ នៅពេលដែលមនុស្សរាល់គ្នា ស្ថិតនៅក្នុងសភាពអស់សង្ឃឹមបំផុត នៅពេលដែលពួកគេមិនអាចរង់ចាំបានតទៅទៀត ហើយមានបំណងចង់ចាប់ផ្ដើមសាជាថ្មី នៅពេលដែលពួកគេចង់សួរខ្ញុំអំពីរឿងដែលកំពុងកើតឡើង នៅពេលដែលមនុស្សខ្លះបណ្ដោយខ្លួនក្នុងការចាយវាយខ្ជះខ្ជាយ ហើយមនុស្សខ្លះនឹកឃើញចង់បះបោរ នៅពេលដែលមនុស្សខ្លះនៅមិនទាន់បានបម្រើខ្ញុំដោយស្មោះត្រង់នៅឡើយ នោះខ្ញុំក៏ចាប់ផ្ដើមផ្នែកទីពីរនៃសម័យនៃការជំនុំជម្រះ ដោយធ្វើការបន្សុទ្ធ និងជំនុំជម្រះរាស្ត្ររបស់ខ្ញុំ។ នេះក៏អាចនិយាយបានថា ខ្ញុំបានចាប់ផ្ដើមបង្វឹករាស្ត្ររបស់ខ្ញុំជាផ្លូវការផងដែរ ដោយធ្វើឱ្យអ្នករាល់គ្នាមិនត្រឹមតែអាចធ្វើបន្ទាល់ដ៏ល្អផូរផង់ថ្វាយដល់ខ្ញុំនោះទេ តែជាងនេះទៅទៀត ក៏អាចធ្វើឱ្យអ្នករាល់គ្នាទទួលបានជ័យជំនះដ៏វិសេសវិសាលនៅក្នុងចម្បាំងដើម្បីខ្ញុំ ចេញពីទីកន្លែងរបស់រាស្ត្រខ្ញុំផងដែរ។

រាស្ត្ររបស់ខ្ញុំគប្បីប្រយ័ត្នប្រយែងចំពោះគ្រោងការបោកបញ្ឆោតរបស់សាតាំងគ្រប់ពេលវេលាទាំងអស់ ដោយចាំយាមច្រកទ្វារនៃដំណាក់របស់ខ្ញុំជំនួសខ្ញុំ។ ពួកគេគួរតែចេះគាំទ្រ និងទំនុកបម្រុងគ្នាទៅវិញទៅមក ដើម្បីចៀសវាងធ្លាក់ចូលទៅក្នុងអន្ទាក់របស់សាតាំង បើមិនដូច្នោះទេ ពេលនោះ ទោះសោកស្ដាយក៏យឺតពេលដែរ។ ហេតុអ្វីបានជាខ្ញុំបង្វឹកអ្នករាល់គ្នាដោយបន្ទាន់បែបនេះ? ហេតុអ្វីបានជាខ្ញុំប្រាប់អ្នករាល់គ្នាពីការពិតនៃពិភពខាងវិញ្ញាណ? ហេតុអ្វីបានជាខ្ញុំក្រើនរំឮក និងដាស់តឿនអ្នករាល់គ្នា ម្ដងហើយម្ដងទៀតបែបនេះ? តើអ្នករាល់គ្នាធ្លាប់បានគិតពីរឿងនេះដែរឬទេ? តើការសញ្ជឹងគិតរបស់អ្នករាល់គ្នាធ្លាប់គិតឃើញយល់ច្បាស់ដែរឬទេ? ដូច្នេះ អ្នករាល់គ្នាមិនត្រឹមតែត្រូវធ្វើឱ្យខ្លួនរីកចម្រើន ដោយការកសាងខ្លួនលើមូលដ្ឋាននៃអតីតកាលនោះទេ ប៉ុន្តែជាងនេះទៅទៀត អ្នករាល់គ្នាក៏ត្រូវតែកម្ចាត់ភាពមិនបរិសុទ្ធនៅក្នុងខ្លួនអ្នករាល់គ្នា ក្រោមការចង្អុលបង្ហាញពីព្រះបន្ទូលនាពេលសព្វថ្ងៃនេះផងដែរ ដោយអនុញ្ញាតឱ្យព្រះបន្ទូលរបស់ខ្ញុំចាក់ឫសកែវនៅក្នុងវិញ្ញាណរបស់អ្នករាល់គ្នា និងចេញផ្កា ហើយសំខាន់ជាងនេះ ដើម្បីឱ្យចេញផ្លែបានកាន់តែច្រើនថែមទៀត។ នេះក៏ព្រោះតែអ្វីដែលខ្ញុំចង់បាននោះ មិនមែនជាផ្កាដែលស្រស់ស្អាតនិងឆើតឆាយនោះទេ តែជាផ្លែដែលមានចំនួនច្រើនក្រាស់ក្រែល ជាផ្លែដែលមិនទុំខូច។ តើអ្នកយល់ពីអត្ថន័យពិតនៃព្រះបន្ទូលរបស់ខ្ញុំទេ? ទោះបីជាផ្កានៅក្នុងផ្ទះកញ្ចក់មានច្រើនឥតគណនាប្រៀបដូចជាផ្កាយ និងទាក់ទាញហ្វូងមនុស្សឱ្យកោតស្ញប់ស្ញែងក៏ដោយ ក៏នៅពេលដែលផ្កាទាំងនោះស្រពោនស្វិតទៅ នោះវាក៏ត្រូវរុះរោយទៅវិញ ប្រៀបដូចជាគ្រោងការបោកបញ្ឆោតរបស់សាតាំងដូច្នោះដែរ ហើយគ្មាននរណាម្នាក់នឹងចាប់អារម្មណ៍ទៀតឡើយ។ អស់អ្នកណាដែលត្រូវខ្យល់បក់បោក ហើយត្រូវព្រះអាទិត្យដុតរោលហើយ តែនៅធ្វើបន្ទាល់អំពីខ្ញុំទៀត ទោះមិនមែនជាផ្ការីកដ៏ស្រស់ស្អាតក៏ដោយ ក៏នៅពេលដែលផ្កានោះរុះរោយទៅ ក៏នឹងចេញផ្លែជាមិនខាន ដ្បិតខ្ញុំតម្រូវឱ្យពួកគេមានលក្ខណៈដូច្នោះឯង។ នៅពេលដែលខ្ញុំមានបន្ទូលទាំងនេះ តើអ្នករាល់គ្នាយល់បានច្រើនប៉ុនណា? នៅពេលដែលផ្ការុះរោយ ហើយចេញជាផ្លែ ហើយនៅពេលដែលផ្លែទាំងអស់នោះអាចឱ្យខ្ញុំទទួលផលបាន នោះខ្ញុំនឹងបញ្ចប់រាល់កិច្ចការរបស់ខ្ញុំទាំងអស់នៅលើផែនដី ហើយចាប់ផ្ដើមទទួលផលពីពន្លឺនៃព្រះប្រាជ្ញាញាណរបស់ខ្ញុំ!

ថ្ងៃទី២២ ខែកុម្ភៈ ឆ្នាំ១៩៩២