ព្រះដ៏មានគ្រប់ព្រះចេស្ដា ព្រះវរបិតាដ៏គង់នៅអស់កល្ប ជាម្ចាស់នៃសេចក្ដីសុខសាន្ត ព្រះជាម្ចាស់របស់យើងគឺជាសេ្ដច! ព្រះដ៏មានគ្រប់ព្រះចេស្ដា ដាក់ព្រះបាទរបស់ទ្រង់នៅលើភ្នំអូលីវ។ ពិតជាស្រស់ស្អាតមែន! ចូរស្ដាប់ចុះ! ពួកយើងដែលជាអ្នកចាំយាម ចូរបន្លឺសម្លេងរបស់ពួកយើងឡើង! ចូរយើងច្រៀងជាមួយគ្នាដោយបន្លឺសម្លេងឡើង ដ្បិតព្រះជាម្ចាស់បានយាងមកឯក្រុងស៊ីយ៉ូនវិញហើយ។ ពួកយើងឃើញនឹងភ្នែករបស់ពួកយើងនូវការបំផ្លាញនៃយេរូសាឡឹម។ ចូរបញ្ចេញសម្លេងដ៏រីករាយ ហើយច្រៀងរួមគ្នា ដ្បិតព្រះជាម្ចាស់បាននាំមកនូវសេចក្ដីកម្សាន្ដចិត្តដល់ពួកយើង ហើយបានប្រោសលោះក្រុងយេរូសាឡិម។ ព្រះជាម្ចាស់បានលាត់ព្រះពាហុដ៏បរិសុទ្ធរបស់ទ្រង់ឱ្យគ្រប់ទាំងសាសន៍បានឃើញផ្ទាល់នឹងភ្នែក រាស្ត្រដ៏ពិតប្រាកដរបស់ព្រះជាម្ចាស់បានលេចមកហើយ! អស់ទាំងចុងនៃផែនដី បានឃើញនូវសេចក្ដីសង្គ្រោះរបស់ព្រះជាម្ចាស់នៃយើងរាល់គ្នា។

ឱ ព្រះដ៏មានគ្រប់ព្រះចេស្ដា! វិញ្ញាណទាំងប្រាំពីរ ត្រូវបានបញ្ជូនចេញពីបល្ល័ង្ករបស់ទ្រង់ទៅកាន់ក្រុមជំនុំនីមួយៗ ដើម្បីបើកសម្ដែងអាថ៌កំបាំងទាំងអស់របស់ទ្រង់។ ដោយការគង់លើបល្ល័ង្កនៃសិរីល្អរបស់ទ្រង់ នោះព្រះអង្គបានគ្រប់គ្រងនគររបស់ទ្រង់ ហើយបានធ្វើឱ្យនគរនោះបានរឹងមាំ និងមានភាពនឹងធឹងប្រកបដោយភាពយុត្តិធម៌ និងសេចក្ដីសុចរិត ហើយទ្រង់បានត្រួតត្រាជាតិសាសន៍ទាំងអស់នៅចំពោះទ្រង់។ ឱ ព្រះដ៏មានគ្រប់ព្រះចេស្ដាអើយ! ទ្រង់បានបន្ធូរខ្សែរឹតរបស់ស្ដេច ទ្រង់បានធ្វើឱ្យទ្វារក្រុងបើកចំហនៅចំពោះទ្រង់ ដោយមិនដែលបិទឡើយ។ ដ្បិតពន្លឺរបស់ទ្រង់បានមកដល់ហើយ ហើយសិរីល្អរបស់ទ្រង់ក៏រះឡើង និងបញ្ចេញពន្លឺយ៉ាងត្រចះត្រចង់។ ភាពងងឹតគ្របដណ្ដប់ផែនដី ហើយសេចក្ដីសូន្យសុងគ្របលើមនុស្ស។ ឱ ព្រះជាម្ចាស់អើយ! ទោះបីជាយ៉ាងណា ទ្រង់បានលេចមក និងបញ្ចេញពន្លឺរបស់ទ្រង់លើពួកយើង ហើយសិរីល្អរបស់ទ្រង់នឹងស្ថិតនៅលើពួកយើង។ អស់ទាំងសាសន៍ នឹងមូលគ្នាមកឯពន្លឺរបស់ទ្រង់ ហើយសេ្ដចទាំងប៉ុន្មាននឹងមកឯរស្មីដែលចេញពីទ្រង់។ ទ្រង់បើកព្រះនេត្ររបស់ទ្រង់មើលជុំវិញ៖ ពួកកូនប្រុសៗរបស់ទ្រង់មូលគ្នាមកឯទ្រង់ ហើយពួកគេមកពីទីឆ្ងាយ។ កូនស្រីៗរបស់ទ្រង់ក៏ត្រូវបានគេបីមកដែរ។ ឱ ព្រះដ៏មានគ្រប់ព្រះចេស្ដាអើយ! សេចក្ដីស្រឡាញ់ដ៏ធំធេងរបស់ទ្រង់បាននៅជាប់ជាមួយពួកយើង។ គឺទ្រង់នេះហើយដែលដឹកនាំពួកយើងដើរនៅលើផ្លូវឆ្ពោះទៅរកនគររបស់ទ្រង់ ហើយគឺព្រះបន្ទូលរបស់ទ្រង់នេះហើយដែលជ្រាបអំពីពួកយើង។

ឱ ព្រះដ៏មានគ្រប់ព្រះចេស្ដាអើយ! ពួកយើងថ្វាយនូវការអរព្រះគុណ និងសរសើរតម្កើងទ្រង់! ចូរឱ្យយើងសម្លឹងទៅរកទ្រង់ នាំយកទីបន្ទាល់ថ្វាយទ្រង់ ស្រឡាញ់ទ្រង់ ហើយច្រៀងទៅរកទ្រង់ដោយចិត្តមួយដែលស្មោះស្ម័គ្រ ស្ងប់ស្ងាត់ និងផ្ចង់ស្មារតី។ សូមឱ្យយើងមានចិត្តតែមួយ ហើយរួមជាមួយគ្នា ហើយសូមឱ្យទ្រង់ធ្វើឱ្យយើងក្លាយជាអ្នកដែលត្រូវនឹងព្រះហឫទ័យទ្រង់ឱ្យបានឆាប់ ដើម្បីត្រូវបានទ្រង់ប្រើប្រាស់។ ដោយហេតុនោះ បំណងព្រះហឫទ័យរបស់ទ្រង់នៅលើផែនដី នឹងអាចត្រូវបានអនុវត្តដោយគ្មានការរារាំង!